DESCRIPTION

ఉద్యోగాలలో, వ్యాపారాలలో ప్రవేశించి తమ ప్రతిభతో రాణించిన స్త్రీల జీవితాలు, వాటిలో వారు రాటు తేలే విధం రుబీనా కొత్తగా రాసింది. నాన్ జడ్జ్మెంటల్గా, అత్యుత్సాహంతో ఒక పక్షం వైపు నిలబడి రాస్తున్నట్లు కాకుండా ఇప్పుడు జీవితం ఇలా ఉంది, నువ్వెలా నిర్ణయించుకుంటావో నీ ఇష్టం అన్నట్లు రాస్తుంది. రుబీనా కథన రీతికి 'సంయమనం' ఎంతో గాంభీర్యాన్నీ, ఆమోదాన్నీ తెచ్చిపెడుతుంది. 'పి.యం.యస్', 'వన్ పర్సన్ కంపెని' కథలలోని స్త్రీల జీవితాల గురించి ఒక చిన్న కథలో రాసి ఒప్పించి, మెప్పించడం చిన్న విషయం కాదు. పాఠకులను తన వాక్యాలను దాటి బయటికి పోకుండా తన వెంటే, కథామార్గంలోనే తీసుకుపోవటం ఎలాగో రుబీనా నేర్చుకుంది. - ఓల్గా. రుబీనా కథలు కేవలం ముస్లిం స్త్రీ సమస్యలను మాత్రమే సృజించి ఉంటాయనుకున్న నా ప్రిజుడిస్ ఆమె కథలు చదివి లోతులు చూస్తే మాయమైంది. ముస్లిం స్త్రీ సమస్యలకు సంబంధించిన కథలు నాలుగు మాత్రమే ఉన్నాయి. మిగతా కథల్లో ఓ రెండు దిగువ మధ్య తరగతికి సంబంధించినవి. మరో రెండు కార్పోరేట్ వ్యవస్థలోవి. అయితే ముస్లిం మహిళల సమస్యలు ఛాందస నేపథ్యంతో సాగితే ఇతర మహిళల సమస్యలు మాత్రం పురుషుల ధోరణిలోని అవకరాల వల్ల ఎదురయేవి. అన్ని జానర్లనూ రుబీనా చేయి తిరిగిన రచయితలానే నిర్వహించారు. - ప్రసేన్